27.03.2026
Џемаил Даути: Зголемувањето на цените е неизбежно, „Даути Комерц“ кон мерки за заштита на потрошувачите
Зголемувањето на цените на прехранбените производи на пазарот се очекува да продолжи и во наредниот период, како директна последица на поскапувањето на енергетските извори, вклучувајќи нафта, гас и електрична енергија, како и порастот на трошоците за снабдување. Ова го изјави директорот на „Даути Комерц“, Џемаил Даути, во изјава за весникот Вeчер Пресс, давајќи јасен преглед на актуелните случувања и очекувањата на пазарот.
Според Даути, компанијата веќе е информирана од меѓународните партнери за нови зголемувања на цените на набавките, кои во некои случаи достигнуваат до 10 проценти, додека во други случаи се предвидуваат поумерени зголемувања од 5 до 6 проценти, во согласност со растот на цените на енергијата и другите извори што влијаат врз трошоците на производите.
Тој истакна дека снабдувањето со прехранбени производи останува стабилно и нема сигнали за недостиг на пазарот, но предупреди дека овие зголемени трошоци ќе се одразат врз конечните цени за потрошувачите.
Во овој контекст, Даути посочи дека „Даути Комерц“ ја разгледува можноста за работа со пониски маржи, со цел да го ублажи влијанието на зголемувањето на цените и да придонесе за зачувување на стандардот на граѓаните.
Директорот на компанијата исто така предложи конкретни мерки за институциите, сугерирајќи укинување на царините и дополнителните давачки за увезените производи, како и намалување на ДДВ за прехранбени производи од 10 на 5 проценти, мерки кои според него директно би влијаеле на намалување на цените на пазарот.
Даути исто така оцени дека мерките како замрзнување на цените и ограничување на маржите покажале контрапродуктивни ефекти, нагласувајќи ја потребата од поодржливи и долгорочни решенија за справување со притисокот врз цените.