25.11.2025
“Dauti Komerc” fituese e Çmimit të Parë në TOP100
“Dauti Komerc” me 88.85 pikë është shpallur kompania më e suksesshme për vitin 2024, duke zënë vendin e parë në listën prestigjioze TOP100-2025, në ngjarjen më të rëndësishme ekonomike të vitit të organizuar nga Oda Ekonomike e Maqedonisë Veriperëndimore.
Ky vlerësim vjen si rezultat i performancës së shkëlqyer të kompanisë sipas pesë kategorive kryesore të metodologjisë TOP100, duke e vendosur “Dauti Komerc” në krye të rangimit kombëtar.
Çmimi iu dorëzua Drejtorit të kompanisë, z. Hamim Dauti, si njohje për kontributin e vazhdueshëm të kompanisë në ekonomi, si dhe për rritjen dhe stabilitetin e saj të qëndrueshëm ndër vite.
Performanca e jashtëzakonshme e “Dauti Komerc” gjatë vitit 2024 e bëri kompaninë të dallojë si lider i padiskutueshëm. Rezultatet kryesore të vitit përfshijnë:
85.5 milionë euro të hyra vjetore
2.1 milionë euro fitim neto
3.8 milionë euro eksport mallrash
3.7 milionë euro investime kapitale
525 të punësuar
Këto tregues të fortë ekonomikë, të kombinuar me stabilitetin dhe filozofinë e rritjes së qëndrueshme, e vendosën kompaninë në krye të listës dhe i dhanë çmimin më të lartë të natës.
Në 2024, kompania u vlerësua me çmimin e parë falë të njëjtave standarde të larta të performancës, investimeve kapitale, rritjes së vazhdueshme dhe kontributit të fortë në tregun vendas dhe atë ndërkombëtar.
Rivendosja e kompanisë në krye në vitin 2025 është dëshmi e konsistencës, profesionalizmit dhe besimit që “Dauti Komerc” ka fituar në treg ndër vite.
Këtë vit Oda Ekonomike e Maqedonisë Veriperëndimore këtë vit shënoi edhe 20 vjetorin e saj. Në fjalët hyrëse, drejtuesit e Odës theksuan rëndësinë e këtij përvjetori, duke nënvizuar se dy dekadat e fundit përfaqësojnë një udhëtim të ndërtuar mbi vizion, bashkëpunim dhe përkushtim ndaj zhvillimit ekonomik. U theksua gjithashtu transparenca dhe profesionalizmi i metodologjisë TOP100™, e cila mbetet procesi më i besueshëm i vlerësimit të kompanive në vend.