Gjenerata e re e familjes Dauti po vazhdon rrugën e suksesit akademik dhe profesional. Jehona Dauti, vajza e drejtorit të përgjithshëm të kompanisë Dauti Komerc, Xhemail Dauti, ka mbrojtur me sukses temën e masterit me titull:

“Sfidat dhe perspektivat e fondeve të investimeve etike – Fokus në ESG Mutual Funds”.

Punimi i saj është vlerësuar si punë origjinale me rëndësi akademike dhe praktike nga komisioni profesional i Fakultetit të Biznesit dhe Ekonomisë në UEJL, i përbërë nga:

* Prof. Dr. Gadaf Rexhepi – mentor,

* Prof. Dr. Veland Ramadani – anëtar,

* Prof. Dr. Shenaj Haxhimustafa – anëtar.

Në fokus të këtij hulumtimi kanë qenë fondet ESG (Environmental, Social, Governance), të cilat sot konsiderohen një nga zhvillimet më të rëndësishme në sistemin financiar global. Studimi trajton mënyrën se si funksionojnë fondet e investimeve etike, në cilat fusha investohet dhe si këto investime ndikojnë pozitivisht në mbrojtjen e mjedisit, përgjegjësinë shoqërore dhe menaxhimin e qëndrueshëm të kompanive.

Vlerë e veçantë e këtij punimi është fakti se kjo temë mbetet ende pak e trajtuar në rajon, duke i dhënë hulumtimit rëndësi të veçantë akademike dhe praktike. Pritet që ky studim të japë kontribut në rritjen e vetëdijes për rëndësinë e investimeve ESG dhe të shërbejë si bazë për hulumtime të mëtejshme akademike dhe profesionale në këtë fushë.

Njëkohësisht, kjo temë përfaqëson një qasje moderne dhe aktuale, e cila pritet të bëhet gjithnjë e më shumë pjesë e kurrikulave universitare, programeve të biznesit dhe strategjive korporative, veçanërisht në fushën e zhvillimit të qëndrueshëm, menaxhimit financiar dhe investimeve etike.

Përmes analizës së saj, Jehona Dauti ka trajtuar sfidat dhe perspektivat afatgjata të fondeve ESG, duke theksuar rëndësinë e investimeve që sjellin jo vetëm fitim financiar, por edhe ndikim pozitiv për shoqërinë dhe mjedisin.

Ky sukses paraqet një arritje personale për Jehona Dautin, por njëkohësisht edhe një moment krenarie për familjen Dauti dhe kompaninë Dauti Komerc, duke dëshmuar përkushtimin ndaj edukimit, zhvillimit profesional dhe vizionit për të ardhmen.